५ वर्ष मुनिको महिला साफ च्याम्पियनसीपमा नेपाल बंगलादेशसँग पराजित भएको छ ।
भुटानमा जारी तेस्रो संस्करणको साफ यू–१५ महिला च्याम्पियनसिपमा नेपालले लगातार दोस्रो हार व्यहोरेको हो।
थिम्पुमा शुक्रबार भएको खेलमा बंगलादेशसँग २-१ ले पराजित हुँदै नेपालले लगातार हार व्यहोरेको हो ।
बंगलादेशलाई जित दिलाउन शाहिदा अख्तर र शामसुन्नहरले एक एक गोल गरिन् । नेपालकी अमिषा कार्कीले एक गोल फर्काईन् ।
पहिलो हाफमा २-० ले पछि परेको नेपालले दोस्रो हाफमा एक गोल फर्काएपनि हारबाट जोगिन सकेन् ।
खेलको १२ औं मिनेटमा शाहिदा अख्तर रिपाले गोल गर्दै बंगलादेशलाई अग्रता दिलाएकी थिइन् । २५ औं मिनेटमा कप्तान शामसुन्नहरले पेनाल्टीमा गोल गर्दै बंगलादेशलाई २-० को अग्रता दिलाए ।
दोस्रो हाफको ६४ औं मिनेटमा अमिषाले एक फर्काएपनि त्यो गोल नेपालको लागि सान्त्वना गोल रह्यो ।
यो हारसँगै उपाधि जित्ने लक्ष्यसहित भुटान पुगेको नेपालको उपाधि होड लगभग सकिएको छ । २ खेलमा नेपालले अंक जोड्न सकेको छैन । अब नेपालले अन्तिम खेलमा आइतबार भुटानसँग खेल्नेछ ।
यसअघि पहिलो खेलमा नेपाल भारतसँग ४–१ गोल अन्तरले पराजित भएको थियो ।
बंगलादेशको भने यो लगातार दोस्रो जित हो । २ खेलमा ६ अंक जोडेको बंगलादेश फाइनल नजिक पुगेको छ ।
बंगलादेशले पहिलो खेलमा घरेलु टोली भुटानलाई २–० गोल अन्तरले हराएको थियो ।
राउण्ड रोबिनको आधारमा जारी प्रतियोगिताको शीर्ष दुई टोलीले फाइनलमा प्रतिस्पर्धा गर्ने छन् ।
