ग्रिसलाई हराउँदै इटलीले युरोकप २०२० मा स्थान सुरक्षित गरेको छ ।
रोममा शनिबार राति भएको खेलमा इटलीले ग्रिसलाई २–० गोल अन्तरले हराएको हो ।
पहिलो हाफ गोलरहित बराबरी खेलेको इटलीले मात्र एकपटक विपक्षी पोष्टमा सही प्रहार गरेको थियो ।
तर, दोस्रो हाफमा सुधारिएको प्रदर्शन गरेको उसका लागि ६३ औं मिनेटमा जोर्निन्योले पेनाल्टी गोलमार्फत अग्रता दिलाए । ग्रिसका इन्ड्रियस बुचलाकसले ह्याण्ड गरेपछि घरेलु टोलीले पेनाल्टी पाएको थियो ।
खेलको ७८ औं मिनेटमा फेडरिको बर्नाडेस्कीले गोल गर्दै इटलीको जित सुनिश्चित गरे ।
जितसँगै समूह ईको शीर्ष स्थानमा रहेको इटलीको २१ अंक भएको छ र तेस्रो स्थानमा रहेको अर्मेनियाभन्दा ११ अंकले अगाडि छ । ग्रिस भने ५ अंकसहित पाँचौं स्थानमा छ ।
