स्पेनिस ला लिगा फुटबलमा अर्को जित दर्ता गर्दै उपाधि दावेदार क्लव रियाल मड्रिड फेरि अंक तालिकाको शिर्ष स्थानमा उक्लिएको छ ।
गएराती भएको खेलमा मालोर्कालाई २-० गोल अन्तरले पराजित गर्दै रियालले बार्सिलोनासंग समान ६८ अंक बनाएको छ । तर हेड-टु-हेडको आधारमा बार्सिलोना भन्दा रियाल अगाडि छ ।
मालोर्का विरुद्धको खेलमा रियालका लागि भिनिसियस जुनियर र सर्जिओ रामोसले गोल गरे । जारी लिगमा रियालले अब सात वटा खेल खेल्न बाँकी छ ।
यदि प्रतियोगिताको शिर्ष स्थानमा कायमै रहेमा रियालले २०१७ पछि पुनः ला लिगाको उपाधि जित्ने छ । ला लिगामा गएराती तीन वटा खेल भएका थिए । अन्य खेलमा भने ओसासुना र सेल्टा भिगो क्लव विजयी भए । ओसासुनाले लाभेसलाई १-० गोल अन्तरले हराउँदा सेल्टा भिगो रियाल सोसिडाडलाई १-० ले नै पराजित गर्दै विजयी भयो ।
