कोरोनाभाइरस संक्रमणको दोस्रो लहर शुरु भएको आशंकामा स्पेनले नियन्त्रणका नयाँ उपायहरु लगाएको छ। अन्य युरोपियन देश पनि सशंकित भएका छन्।
स्पेनको क्याटालाना राज्यमा रात्रिकालीन व्यवसाय दुई साताका लागि बन्द गरिएको छ। क्याटालानाको राजधानी बार्सिलोना स्पेनको बढी जनघनत्व भएको शहरमध्येमा पर्छ। उत्तरपूर्वी केही शहरमा पनि लगातार संक्रमितको संख्या बढेपछि त्यहाँबाट दोस्रो लहर शुरु भएको आशंका गरिएको हो।
स्पेनमा अहिले दैनिक दुई हजार ५०० को हाराहारीमा नयाँ संक्रमित भेटिन थालेका छन्। २४ जुलाईमा दुई हजार २५५ नयाँ संक्रमित फेला परेका थिए भने २३ जुलाईमा दुई हजार ६१५ संक्रमित भेटिएका थिए।
करीब एक महीनाअघि बन्दाबन्दी खुलेपछि राजधानी मड्रिड लगायत प्रमुख शहरहरु बार्सिलोना, जारागोजा लगायतमा संक्रमित बढेका छन्। खासगरी युवामा बढी संक्रमण देखिएको छ। दोस्रो डिभिजनको फुटबल क्लब फुएन्लाब्राडाका २८ जना एक साथ संक्रमित भएका छन्।
स्पेनमा संक्रमण बढेपछि अन्य युरोपियन मुलुकले नयाँ प्रतिबन्ध लगाएका छन्। बेलायत र नर्वेले स्पेनबाट फर्किने आफ्ना देशका नागरिकलाई अनिवार्य ‘सेल्फ क्वारेन्टिन’ मा बस्नुपर्ने नियम लगाएका छन्। फ्रान्सले आफ्ना नागरिकलाई स्पेन नजान चेतावनी दिएको छ।
फ्रान्स र जर्मनीमा पनि संक्रमितको संख्या बढ्न थालेको छ। त्यहाँ संक्रमणलाई रोक्नु पर्ने र अर्थव्यवस्था चलायमान बनाउन स्वभाविक जीवनमा फर्कनुपर्ने पक्षहरुबीच बहस चर्किएको छ। रोयटर्स
