नेपाल राष्ट्र बैंकले सम्भव भएसम्म विद्युतीय माध्यमबाट बैंकिङ कारोबार गर्ने व्यवस्था मिलाउन बैंक तथा वित्तीय संस्थालाई निर्देशन दिएको छ।
राष्ट्र बैंकले बुधबार सूचना जारी गर्दै विद्युतीय माध्यमबाट हुने कारोबारको सुनिश्चितता मिलाउन निर्देशन दिएको हो। कोरोना भाइरसको रोकथाम र नियन्त्रणका लागि काठमाडौंका स्थानीय प्रशासनले बुधबार रातीबाट निषेधाज्ञा जारी गरेको सन्दर्भमा केन्द्रीय बैंकले पनि सकभर विद्युतीय माध्यमबाट कारोबार हुने व्यवस्था मिलाउन निर्देशन दिएको हो।
राष्ट्र बैंकले एटीएम मेसिनहरूमा पर्याप्त नगद राख्न र त्यसको निगरानी गर्न पनि बैंक तथा वित्तीय संस्थालाई निर्देशन दिएको छ। त्यसैगरी, सम्बन्धित स्थानीय प्रशासनसँग समन्वय गरी सम्भव भएसम्म निश्चित समयसम्मका लागि आलोपालो मिलाई निश्चित कर्मचारीबाट मात्रै काम गर्ने व्यवस्था मिलाउन भनिएको छ।
राष्ट्र बैंकले न्यूनतम संख्यामा मात्र शाखा खोली आधारभूत बैंकिङ कारोबार हुने व्यवस्था मिलाउन निर्देशन दिएको छ। बैंक तथा वित्तीय संस्थाहरूले काठमाडौं उपत्यकामा सीमित संख्यामा मात्र शाखा खोल्ने तयारी गरेका छन्।
त्यसैगरी, अत्यावश्यक वस्तुको आपूर्ति सुनिश्चित गर्न ड्राफ्ट, टीटी, प्रतीतपत्र, ग्यारेन्टीजस्ता कारोबार हुने व्यवस्था मिलाउन पनि निर्देशन दिइएको छ ।
