ब्राजिलियन स्टार फुटबलर नेयमारसहित यूरोपेली च्याम्पियन्स लिग फाइनलिस्ट पेरिस सेन्ट जर्मेन (पीएसजी)का तीन खेलाडीमा कोरोनाभाइरस संक्रमण पुष्टि भएको छ।
पीएसजीले बुधबार साँझ वक्तव्यमार्फत् आफ्ना तीन खेलाडीमा कोरोना संक्रमण भएको पुष्टि गरेको छ। बीबीसी स्पोर्टस्का अनुसार क्लबको वक्तव्यमा उनीहरुको नाम उल्लेख गरिएको छैन।
फ्रान्सको फ्रेन्च भाषाको चर्चित स्पोर्टस् न्यूज पोर्टल ‘द टीम’ले तीन जना खेलाडीमध्ये एक नेयमार पनि रहेको उल्लेख गरेको छ। उसले लेखेको छ, “पीएसजीले आफ्ना तीन खेलाडीमा कोरोनाभाइरस संक्रमण पुष्टि गरेको छ। हामीलाई प्राप्त सूचनाअनुसार ती तीनजनामा नेयमार, डी मारिया र परेडेस छन्।”
चिनिया समाचारपत्र ग्लोबल टाइम्सले पनि ‘द टीम’लाई उद्धृत गर्दै नेयमारसहित तीन खेलाडीमा कोरोना संक्रमण पुष्टि भएको उल्लेख गरेको छ।
यसपालिको यूरोपेली च्याम्पियन्स लिग फाइनलमा बायर्न म्युनिखसँग १-० गोलले पराजित भएपछि पीएसजीले आफ्ना खेलाडीलाई लामो विदा मनाउने अनुमति दिएको थियो। त्यही क्रममा उनीहरु संक्रमित भएको अनुमान छ।
दुई दिन अघि मात्र म्यानचेस्टर सिटी छाडेर स्पेनिस क्लब रियल सोसिडाड पुगेका डेबिड सिल्भालाई कोरोना संक्रमण पुष्टि भएको थियो। –द गार्डियन
