आज काठमाडौँ उपत्यका भित्र चार सय ४५ जना सहित थप एक हजार दुई सय २८ जनामा संक्रमण पुष्टि भएपछि नेपालमा कोरोना भाइरसबाट सङ्क्रमित हुनेको सङ्ख्या ४२ हजार आठ सय ७७ पुगेको छ ।
स्वास्थ्य तथा जनसङ्ख्या मन्त्रालयको नियमित प्रेस व्रिफिङमा मन्त्रालयका प्रवक्ता प्रा.डा. जागेश्वर गौतमले आज १३ हजार चार सय १३ वटा नमुनाको रियल टाइम पिसिआर परीक्षण गर्दा तीन सय ९४ जना महिला र आठ सय ३४ जना पुरुषमा संक्रमण पुष्टि भएको जानकारी दिनुभयो ।
मन्त्रालयका प्रवक्ता प्रा.डा. गौतमले दिनुभएको जानकारी अनुसार आज काठमाडौँका तीन सय ५७, ललितपुरका ४६ र भक्तपुरका ४२ जनामा संक्रमण पुष्टि भएको छ ।
आज देश भरमा गरी १८ हजार चार सय १३ जना सक्रिय सङ्क्रमित रहेका छन् ।
सक्रिय सङ्क्रमितहरू मध्ये १० हजार छ सय ७१ जना संस्थागत आइसोलेसनमा र सात हजार सात सय ४२ जना होम आइसोलेसनमा रहेका छन् ।
सक्रिय सङ्क्रमित हरू मध्ये कडा लक्षण देखिएका एक सय ४१ जनाको आइसियु र १७ जनाको भेन्टिलेटरमा उपचार भइरहेको प्रवक्ता प्रा.डा. गौतमले जानकारी दिनुभयो ।
यसै गरी आज थप नौ सय १७ जना संक्रमण मुक्त भएसँगै हालसम्म २४ हजार दुई सय सात जना कोरोना सङ्क्रमण मुक्त भएका छन् । हालसम्म ५६ प्रतिशत सङ्क्रमित निको भएको मन्त्रालयले जनाएको छ ।
यस्तै आज थप ६ जनाको मृत्यु भएपछि कोरोना संक्रमण पछि मृत्यु हुनेको सङ्ख्या दुई सय ५७ पुगेको छ ।
आज चितवन, भक्तपुर, तनहुँ र रुपन्देहीका एक/एक जना महिला तथा सिन्धुपाल्चोक र रुपन्देहीका एक÷एक जना पुरुषको मृत्यु भएको मन्त्रालयका प्रवक्ता प्रा.डा.जागेश्वर गौतमले जानकारी दिनुभयो ।
