अबुधाबीमा मंगलबार राति भएको खेलमा सनराइजर्स हैदराबादले दिल्ली क्यापिटल्सलाई १५ रनले पराजित गर्दै पहिलो जित निकालेको हो ।
हैदराबादले दिएको १ सय ६३ रनको लक्ष्य पछ्याएको दिल्लीले २० ओभरमा ७ विकेट गुमाएर १ सय ४७ रन मात्र बनाउन सक्यो । दिल्लीका शिखर धवनले ३४ तथा ऋषब पन्तले ३२ रन बनाए । शिम्रन हिटमायरले २१ रन जोड्दा कप्तान श्रेयस आयरले १७ रन बनाए । कागिसो राबडा १५ रनमा अविजित रहे । दिल्लीलाई सस्तैमा समेट्न राशिद खानले ३ विकेट लिए । भुवनेश्वर कुमारले २ विकेट झारे । अमित मिश्रा र कागिसो राबडाले २–२ विकेट लिए ।
यस अघि टस हारेर पहिले ब्याटिङ गरेको हैदराबादले २० ओभरमा ४ विकेट गुमाएर १ सय ६२ रन बनाएको थियो । हैदराबादका लागि जोनी बेयर्स्टोले ४८ बलमा ५३ रनको अर्धशतकीय इनिङ्स खेले ।
कप्तान डेभिड वार्नरले ४५ रन र केन विलियम्सनले ४१ रन बनाए । यस्तै अब्दुल समादले १२ रन बनाए । मनिस पाण्डे ३ रनमा आउट भए । जितसँगै हैदराबादले ३ खेलमा २ अंक जोडेको छ ।
यसअघि हैदराबाद दुई खेलमा पराजित भएको थियो । पहिलो खेलमा रोयल च्यालेन्जर्स बैंगलोरसँग १० रनले पराजित भएको थियो भने दोस्रो खेलमा कोलकत्ता नाइट राइडर्ससँग ७ विकेटले पराजित भएको थियो ।
नेपाली क्रिकेटर सन्दीप लामिछाने सम्मिलित दिल्लीको यो पहिलो हार हो ।
