पूर्ब राष्ट्रपति बराक ओबामाले कोरोना सङ्क्रमित राष्ट्रपति ट्रम्पलाई शिघ्र स्वास्थ्यलाभको कामना गर्नुभएको छ । उहाँले ट्रम्प दम्पत्तीलाई सामाजिक सञ्जालमा लाभको कामना गर्नुभएको हो ।
राष्ट्रपति ट्रम्पको कार्यशैलीको तीब्र आलोचना गर्दै आउनुभएका बराक ओबामाले स्वास्थ्यलाभ सन्देशमा लेख्नुभएको छ, “राष्ट्रपति र पहिलो महिलासँगै कोरोनाभाइरसका सबै सङ्क्रमितले आवश्यक हेरचाह पाइरहेको आशा गरेको छु र छिट्टै निको हुने आफू र मिसेल ओबोमाले विश्वास लिएका छौं ।”
राष्ट्रपति चुनाबमा ओबामाले डेमोक्रयाट उम्मेदवार जोइ बिडेनको खुलेर समर्थन गर्दै प्रचारप्रसार गर्दै आउनुभएको छ ।
उहाँले सामाजिक सञ्जाल फेसबुकमा अगाडि लेख्नुभएको छ, “हामी राजनीतिक युद्धमा छौं, तर दलभन्दा माथि उठेर हरेक अमेरिकी स्वस्थ्य हुनुपर्ने हाम्रो मान्यता छ ।”
बराक ओबामाले शिघ्र स्वास्थ्य लाभको लागि गर्नुभएको सन्देशमा करिब ५० हजार व्यक्तिले प्रतिक्रिया जनाएका छन् । ओबामाको उक्त सन्देश एक लाख जनाले साझा गरेका छन् ।
–रासस/एएफपी
