सनराइजर्स हैदरावादले इन्डियन प्रिमियर लिग आइपीएल क्रिकेटमा आफ्नो तेस्रो जित निकालेको छ ।
गएराती सम्पन्न खेलमा हैदरावादले पञ्जावलाई ६९ रनको फराकिलो जित निकालेको हो । टस जितेर पहिले ब्याटिङमा उत्रिएको हैदरावादले निर्धारित २० ओभरमा ६ विकेटको क्षतिमा २०१ रन बनाएको थियो ।
२०२ रनको ठूलो जितको लक्ष्य पछ्याउँदै ब्याटिङमा उत्रिएको किङ्स इलेभेन पञ्जावले १६ दशमलव ५ ओभरमा सबै विकेटको क्षतिमा १३२ रन मात्र बनाउन सकेपछि यो जित हैदरावादको हातमा गएको हो ।
५५ बलमा ९७ रन बनाएवापत हैदरावादका जोनी बारिस्टोक म्यान अफ द म्याच घोषित भए । यो जितसँगै हैदरावाद लिग अंकको तालिकामा तेस्रो स्थानमा उक्लिएको छ ।
आज साँझ हुने खेल भने सन्दिप लामिछाने सम्मिलित दिल्ली क्यापिटल्स र राजस्थान रोयल्सबीच हुँदैछ । नेपाली क्रिकेटर सन्दिप लामिछाने मैदानमा उत्रिएको हेर्ने चाहना भने सबै नेपालीमा तीव्र छ । –एआईएन
