दुनै,डोल्पा । डोल्पा जिल्लामा आयोजित जिल्ला स्तरीय कृषि प्रदर्शनी मेला सम्पन्न भएको छ । प्रदर्शनीमा जिल्लाका कृषकले उत्पादन गरेको विभिन्न कृषि जन्य उत्पादनहरू राखेका थिए ।
कर्णाली प्रदेश सभा सदस्य सांसद बिरबहादुर शाहीले केशरको बिरुवामा पानी राखेर मेलाको उद्घाटन गरेका गरेको उक्त मेलामा उत्कृष्ट कृषक समूह, सहकारी, कृषकहरूलाई नगद, प्रमाणपत्र प्रदान गरिएको छ ।
जिल्लाभरका कृषकर्लाइ कृषि मेलामा सहभागी हुन भनिए पनि भौगोलिक विकटताका कारण सबै कृषक सहभागी हुन नसकेको कृषि विकास कार्यालय डोल्पाले जनाएको छ ।
तेलहन, दलहन र फलफुलले भरिपूर्ण रहेको मेलामा सयौ मानिसहरूले अवलोकन गरेका थिए । डोल्पामा अर्गानीक तरकारी तथा फलफुल उत्पादन बढ्दो रहेकोले सबैले कृषिमा ध्यान दिन त्रिपुरा सुन्दरी नगरपालिकाका नगरप्रमुख ओम बहादुर बुढाले कृषकलाई आग्रह गरे ।
मेलाले कृषकलाई उत्साहित जागरूक बनाएको र प्रदेश सरकारले कृषिका लागि अझै धेरै सहयोग गर्ने कर्णाली प्रदेश सरकारका सदस्य सांसद बिरबहादुर शाहीले प्रतिबद्धता जनाए । शाहीले भने ‘अघिल्लो आर्थिक वर्षमा कृषिमा डोल्पा उत्कृष्ट नै भएको थियो यो वर्ष पनि राम्रो नतिजा ल्याउने आसा छ ।’
मेलामा सहभागी कृषकले सान्त्वना स्वरूप प्रमाणपत्र र नगद सहित सम्मान पाएका छन् । मेलामा जिल्लाका अपत्यारिला स्याउ, ओखर, मुला, लौका लगायत अन्य कृषि उत्पादन राखिएका छन् भने स्याउ,आरुका जुस जाम र चाना पनि राखिएका छन् ।
त्यसका साथै कोसेली घरका सामान समेत कृषि मेलामा प्रदर्शनी गरेर राखेका छन् ।
रासस
