गत २८ दिनदेखि अनशनरत चिकित्सक प्राडा गोविन्द केसीले सरकारसँगको आठ बुँदे सहमतिपछि आइतबार बिहान अनशन तोडेका छन् ।
डा केसीलाई अनशनस्थल, त्रिवि शिक्षण अस्पतालमा एक सरसफाइ कर्मचारीले जुस पिलाएर अनशन तोडाएका हुन् ।
केसीले गत भदौ २९ गतेदेखि जुम्लाबाट १९औँ अनशन शुरु गरेका थिए । स्वास्थ्यस्थिति खराब हुन थालेको बहानामा सरकारले असोज ६ गते नै उनलाई काठमाडौं ल्याए पनि लामो समय अनसनमा बस्न दिएर थकित पारेपछि बल्ल सहमति गरेको हो ।
शनिबार राति सरकारी वार्ता समिति र डा केसीबीच आठ बुँदे सहमति भएको थियो । शिक्षा, विज्ञान तथा प्रविधि मन्त्रालयका सचिव एवम् वार्ताटोलीका संंयोजक गोपी मैनाली र डा केसीले सहमतिमा हस्ताक्षर गरेका छन् ।
सरकारले मेडिकल शिक्षाका लागि विभिन्न ठाउँमा कलेज स्थापना गर्न लागेसमेतको जानकारी गराउँदै गेटा मेडिकल कलेज भवन र अस्पताल भवन निर्माण सम्पन्न भइसकेको र अन्य पूर्वाधार निर्माणको काम अन्तिम चरणमा रहेको जनाएको छ ।
यस्तै कर्णाली स्वास्थ्य विज्ञान प्रतिष्ठानद्वारा एमबिबिएस कार्यक्रम सञ्चालनका लागि चिकित्सा शिक्षा आयोग समक्ष स्वयम मूल्याङ्कन प्रतिवेदन पेश गरिसकेको छ ।
यस्तै प्रत्येक प्रदेशमा सरकारी मेडिकल कलेज स्थापनाका लागि बर्दिवास, बुटवल र सुर्खेतमा जग्गा प्राप्ति र गुरु योजना स्वीकृत भइरहेको, वातावरणीय प्रभाव मूल्याङ्कन स्वीकृतको अन्तिम चरणमा रहेको छ र हाल विस्तृत परियोजना प्रस्ताव सम्बन्धि कार्य प्रारम्भ भइसकेको जनाएको छ ।
२०६९ सालदेखि डा. बाबुराम भट्टराई प्रधानमन्त्री भएका बेलामा सुरु भएको डा. केसी १९ औं पटक आमरण अनसन बसेका हुन् ।
अब बीसौं पटक आमरण अनसन बस्न नपारियोस् भनी उनका समर्थकले चेतावनी दिएका छन् ।
