सङ्घीय संसद् अधिवेशन भोलिबाट सुरु हुने भएको छ ।
प्रतिनिधिसभाको नवौँ र राष्ट्रिय सभाको दसौँ अधिवेशन भोलि अपराह्न ४ बजे सङ्घीय संसद् भवन नयाँ बानेश्वरमा एक साथ सुरु हुने संसद् सचिवालयले जनाएको छ ।
प्रतिनिधिसभाको भोलिको बैठकमा अघिल्लो अधिवेशन अन्त्य भएपछि जारी भएको अध्यादेश पेस हुने कार्यसूची रहेको सङ्घीय संसद् सचिवालयका सहायक प्रवक्ता दशरथ धमलाले जानकारी दिनुभयो ।
यसैगरी भोलिको बैठकमा यसभन्दा अघिल्लो अधिवेशनमा सदनमा पेस भएका अध्यादेशहरू निर्णयार्थ पेस हुने कार्यसूची रहेको छ ।
बैठकमा राष्ट्रपतिबाट प्राप्त अधिवेशन आह्वान सम्बन्धी पत्रको ब्यहोरा पढेर सुनाउने, बैठकको अध्यक्षता गर्ने सदस्यहरूको मनोनयन गर्ने र शोक प्रस्ताव पारित गर्ने कार्यसूची रहेको छ ।
राष्ट्रिय सभाको भने भोलि बिहान ११ बजे बस्ने कार्य व्यवस्था परामर्श समितिको बैठकले कार्यसूची तय गर्ने सहायक प्रवक्ता धमलाले बताउनुभयो ।
