अन्तालिया कूटनीति मञ्चमा भाग लिने नेपाली प्रतिनिधिमण्डलको नेतृत्व गर्दै टर्कीको अन्तालियामा रहनुभएका परराष्ट्र मन्त्री डा नारायण खड्का र संयुक्त अरब इमिरेट्स (युएई)का अर्थमन्त्री अब्दुल्ला बिन तक अल मारीबीच द्विपक्षीय भेटवार्ता भएको छ ।
त्यस अवसरमा दुवै देशका मन्त्रीले द्विपक्षीय सम्बन्ध र आपसी सहयोगका महत्त्वपूर्ण पक्षहरूको समीक्षा गर्नाका साथै दुई मुलुकबिच व्यापार र लगानीका अवसरलाई थप विस्तार गर्नबारे विचार विमर्श गर्नुभएको थियो ।
मन्त्री खड्काले नेपाली उत्पादनको निर्यात बढाउन सहज बजार पहुँचका निम्ति सहजीकरण गर्न तथा नेपालमा उपलब्ध लगानीका अवसरको उपयोग गर्न अर्थमन्त्रीसँग आग्रह गर्नुभएको थियो ।
आर्थिक सहयोग विस्तार, जनता–जनताबिचको सम्पर्क अभिवृद्धि र पर्यटन प्रवर्द्धन लगायत द्विपक्षीय साझेदारीका विभिन्न आयाममा उहाँहरूबिच छलफल भएको परराष्ट्र मन्त्रालयले जनाएको छ । साथै मन्त्री खड्काले युएईमा रहेका नेपाली आप्रवासी कामदारको रक्षा गरेकामा युएई सरकारको सराहना गर्नुभएको थियो । युएई नेपालको प्रमुख श्रम गन्तव्य मुलुक हो ।
आजै परराष्ट्र मन्त्रीले ५० भन्दा बढी देशका परराष्ट्र मन्त्री र नीति निर्माता तथा विज्ञहरूको सहभागितामा ‘लोकतान्त्रिक शासन र सुरक्षा’ तथा ‘दिगो क्षेत्रीय विकासका लागि नयाँ एसिया’ विषयमा भएका दुई बेग्लाबेग्लै सत्रलाई सम्बोधन गर्दै समसामयिक क्षेत्रीय तथा अन्तर्राष्ट्रिय मुद्दा केन्द्रित रहेर नेपालका धारणा प्रस्तुत गर्नुभएको थियो । -रासस
