नवलपरासी पूर्बको दुम्कौलीस्थित शास्वतधाममा आजदेखि विराट हनुमान कथा प्रबचन सुरु भएको छ । भारतस्थित बागेश्वरधामका आचार्य धीरेन्द्र कृष्ण शास्त्री (बागेश्वर बाबा) ले तीन दिनसम्म हनुमान कथा प्रबचन गर्नु हुनेछ ।
प्रवचन आजदेखि सुरु भएको चौधरी ग्रुपका प्रबन्ध निर्देशक निर्माण चौधरीले बताउनुभयो । बागेश्वर बाबाको नामले चर्चित धीरेन्द्रकृष्ण शास्त्री आज नै काठमाडौंबाट भरतपुर बिमानस्थल हुदै दुम्कौलीस्थित शास्वतधाममा आउनुभएको हो ।
“शास्वतधाममा आगामी सोमबारसम्म दिउँसो २ बजेबाट साँझ ५ बजेसम्म बागेश्वर बाबाले कथा वाचन गर्नु हुनेछ” उहाँले भन्नुभयो, “हनुमान कथा प्रबचनका लागि दैनिक १० हजारदेखि २० हजारसम्म अटाउनेगरी भक्तजनलाई कथा श्रवणका लागि बस्ने ब्यबस्था मिलाइएको छ ।”
शास्त्रीको कथा सुन्न शास्वतधाममा प्रबेशका लागि अनलाइन पासको ब्यबस्था गरिएको छ । शास्वतधामस्थल क्षेत्रमा आवश्यक सबै सुरक्षा ब्यबस्था मिलाइएको जिल्ला प्रहरी कार्यालय नवलपरासी पूर्वका प्रहरी उपरीक्षक भुवनेश्वर तिवारीले बताउनुभयो ।
उद्योगपती एवं प्रतिनिधि सभा सदस्य बिनोद चौधरीले निर्माण गर्नुभएको शास्वतधाम मन्दिरमा हुने धार्मिक सभामा उपस्थित हुन शास्त्री पहिलो पटक नेपाल आउनुभएको हो ।
शास्वतधाम हिन्दु धर्मका सबै देवी देवताको एकै थलोमा पुजा गर्न सकिने मन्दिरका रुपमा चर्चित छ । शास्वतधाम वास्तुशास्त्रअनुसार निर्माण गरिएको रमणीय र आकर्षक शैलीको हिन्दु मन्दिर हो । यहाँ संस्कृत गुरुकुल समेत सञ्चालन गरी कक्षा ६ देखि ८ सम्म पढाइ सञ्चालन हुँदैआएको छ । रासस
