एसिया कप क्रिकेटको दोस्रो खेलमा नेपालसँग भारत १० विकेटले विजयि भएको छ ।
समूह ‘ए’ मा लगातार दोस्रो हारसँगै नेपाल एसिया कपबाट बाहिरिएको छ । नेपाल आफ्नो पहिलो खेलमा पाकिस्तानसँग उसैको मैदानमा दुई सय ३८ रनले पराजित भएको थियो ।
जितसँगै भारत सुपर चारमा प्रवेश गरेको छ । पाकिस्तानले यसअघिनै सुपर चारमा स्थान बनाईसकेको छ । भारत र पाकिस्तानबीच शनिबारको खेल वर्षाका कारण रद्द भएको थियो । नेपालले बलिया टोली पाकिस्तान र भारतसँग पहिलो पटक खेलेको हो ।
श्रीलङ्काको केन्डीस्थित पालेकेल अन्तर्राष्ट्रिय क्रिकेट मैदानमा सोमबारको खेल वर्षाका कारण २३ ओभरमा झारिएको थियो । डकवर्थ लेविस प्रणालीका आभारमा जितका लागि एक सय ४५ रनको लक्ष्य पछ्याएको भारतले २०.१ ओभरमा बिनाविकेटको क्षति एक सय ४७ रन बनायो । भारतको जितमा ओपनरद्वय कप्तान रोहित शर्मा र शुबमन गिलले सानदार अर्धशतकीय इनिङ्स खेले ।
रोहितले अविजित ७४ रन बनाए । उनले ५९ बलमा ६ चौका र पाँच छक्काको सहयोगमा उक्त रन बनाएका हुन्। शुबमनले ६७ रन बनाए । उनले ६२ बलमा आठ चौका र एक छक्काको सहयोगमा उक्त रन जोडेका हुन ।
नेपालले दिएको दुई सय ३१ रनको विजयी लक्ष्य पछ्याएको भारतले २.१ ओभरमा १७ रन बनाउँदा वर्षाको कारण खेल रोकिएको थियो । दुई घण्टा भन्दाबढी समय रोकिएपछि खेल २३ ओभरमा झारिएको थियो ।
यसअघि टस हारेर पहिला ब्याटिङ गर्ने निम्तो पाएको नेपालले ४८.२ ओभरमा सवै विकेटको क्षतिमा दुई सय ३० रन बनाएको थियो । नेपालका लागि ओपनर आशिफ शेखले अर्धशतकीय इनिङ्स खेले ।
उनले ९७ बलमा आठ चौकासहित सर्वाधिक ५८ रन बनाएका हुन् । अर्का ओपनर कुशल भुर्तेलले २५ बलमा तीन चौका र दुई छक्काको सहयोगमा ३८ रन बनाए ।
सोमपाल कामीले ५६ बलमा एक चौका र दुई छक्कासहित ४८ रनको महत्त्वपूर्ण योगदान दिए । ओपनर आसिफ र कुशलले पहिलो विकेटका लागि ९.५ ओभरमा ६५ रनको उत्कृष्ट साझेदारी गरेका थिए ।
यस्तै दीपेन्द्रसिंह ऐरीले २९ र गुलशन झाले २३ रन बनाउनुभयो । सन्दीप लामिछानेले नौ, भीम सार्कीले सात, कप्तान रोहित पौडेलले पाँच, कुशल मल्ल र करण केसीले समान दुई दुई रन जोडे ।
ललित राजवंशी शून्य रनमा आउट भए । बलिङमा भारतका मोहम्मद सिराज र रवीन्द्र जडेजाले तीन तीन विकेट लिए । मोहम्मद शामी, शार्दूल ठाकुर र हार्दिक पाण्डेयले एक एक विकेट लिए ।
एसिया कपको समूह ‘बी’ मा श्रीलङ्का, बङ्गलादेश र अफगानिस्तान छन् । समूहको शीर्ष दुई टोली सुपर चारमा प्रवेश गर्नेछन् । सुपर चारको शीर्ष दुई टोलीबीच उपाधिका लागि प्रतिस्पर्धा हुनेछ ।
एसिया कपको आयोजक पाकिस्तान भएपनि अधिकांश खेलहरू श्रीलङ्कामा सञ्चालन भइरहेका छन् । नेपाल पाकिस्तानसँग उसैको मैदानमा खेलेर भारतसँग खेल्न श्रीलङ्का गएको थियो । भारतले पाकिस्तान गएर खेल्न अस्वीकार गरेपछि एसिया कपका खेल पाकिस्तान र श्रीलङ्कामा सञ्चालन गरिएको हो ।
म्याच हाइलाइट्स हेर्नुहोस् ..
भिडियो सौजन्यः एसियन क्रिकेट काउन्सिल
