नेपालको उत्कृष्ट पर्यटकीय गन्तव्यका रूपमा रहेको रारामा छ महिनामा ६ हजार बढी पर्यटक पुगेका छन् ।
रारा राष्ट्रिय निकुञ्जको कार्यालयले दिएको जानकारी अनुसार गत साउन १ गतेदेखि पौष मसान्तसम्ममा आन्तरिक पर्यटक ६ हजार ५५७ सार्क तथा विदेशी मुलुकबाट १५६ जना गरी छ महिनामा ६ हजार ७१३ पर्यटकले रारा अवलोकन भ्रमण गरेका हुन ।
रारा राष्ट्रिय निकुञ्ज कार्यालयका संरक्षक अधिकृत राजु घिमिरेले ६ महिनामा ६ हजार ७१३ पर्यटकले रारा भ्रमण गरेको बताउनुभयो ।
चालू वर्षको ६ महिना मै रारा आउने पर्यटकको संख्या वृद्धि हुनु सुखद रहेको पनि अधिकृत घिमिरेले बताउनुभयो ।
दसैं-तिहार बिदामा रारामा आन्तरिक पर्यटक बढी आएको निकुञ्जले जनाएको छ। यो चालु आवको ६ महिनामा पर्यटक सहित अन्य शुल्क,सजाय,जरिवानाबाट निकुञ्जले करिब २२ लाख १८ हजार राजस्व असुल गरेको पनि रारा राष्ट्रिय निकुञ्जको कार्यालयले जनाएको छ ।
गत वर्ष ११ हजार आन्तरिक पर्यटकले रारा भ्रमण गरेका थिए भने सार्क मुलुकबाट २६ जना र अन्य विदेशी एक सय ८३ पर्यटक आएका थिए।
कोरोना महामारीका कारण चार वर्षसम्म शिथिल बनेको पर्यटकीय क्षेत्र रारामा यो वर्ष पर्यटक आगमन बढ्ने देखिएको हो ।
निकुञ्ज कार्यालयले रारा भ्रमणमा आउने आन्तरिक पर्यटकबाट प्रति व्यक्ति एक सय सार्क मुलुकका पर्यटकबाट प्रतिव्यक्ति एक हजार पाँच सय र अन्य विदेशी पर्यटकबाट प्रति व्यक्ति तीन हजारका दरले प्रवेश शुल्क उठाउने गरेको छ। हवाई मार्गबाट ७५ प्रतिशत र सडक मार्गबाट २५ प्रतिशत पर्यटक रारा भ्रमण गर्न आउने गरेका छन् ।
पर्यटन व्यवसायीहरूले भने सडक र हवाई मार्ग भरपर्दो नहुँदा रारामा अझै पर्यटक आगमन उल्लेख्य रूपमा वृद्धि हुन नसकेको गुनासो गरेका छन् । रारा क्षेत्रमा पर्यटकलाई बास बस्ने सुविधायुक्त होटल र मनोरञ्जनका साधन समेत छैनन् ।
भरपर्दो सडक, सुविधा सम्पन्न होटल, नहुँदा पर्यटकले बाटोमा सास्ती खेप्नु परेको गुनासो सधैँ गर्दै आएका छन् । यो जाडो मौसममा पनि रारा आउने पर्यटकको सङ्ख्या बढेको देखिन्छ । यो बेला रारा क्षेत्रको तापक्रम रातिमा माइनस ८ र बिहान दिउँसो माइनस ५ सम्म पुग्ने रारा मौसम केन्द्रका अब्जवर वास्मती रावल ले बताउनुभयो ।
यति चिसो हुँदा हुँदै पनि विगत वर्षहरूमा वर्षभरि आएका पर्यटन भन्दा बढी पर्यटक चालू वर्षको ६ महिनामा आएकाले यो वर्ष रारामा पर्यटक १५(१६ हजारसम्म पुग्ने अनुमान गरिएको छ ।
यो वर्ष हिमपात नभएकाले हिउँ परे रारामा हिउँ खेल्न आउने पर्यटकहरू बढ्ने पनि निकुञ्जले अनुमान गरेको छ । रासस
