भारतमा किसानहरुले विभिन्न माग राख्दै पुनः आन्दोलन सुरु गरेका छन्। छिमेकी राज्यहरुबाट राजधानी दिल्लीतर्फ उनीहरु अघि बढेका छन्।
दिल्ली प्रहरीले किसानहरूको प्रदर्शनलाई ध्यानमा राख्दै राजधानी दिल्लीमा सुरक्षा व्यवस्था कडा पारेको छ । सोमबारदेखि पाँच वा सोभन्दा बढी व्यक्ति भेला हुन निषेध गर्ने आदेश जारी गरिएको छ।
दिल्ली वरपरको अन्तर–राज्य सिमानाहरूमा भारी सुरक्षा तैनाथी गरिएको छ सयौँ किसानहरू यी प्रवेश र निकास बिन्दुहरूमा चिसो जाडोको सामना गर्दै सडकहरूमा धर्नामा बसिरहेका देखिन्छन् ।
किसानले आफ्नो बालीको न्यूनतम समर्थन मूल्य वृद्धि, किसान र कृषि मजदुरलाई पेन्सन, कृषि ऋण माफी, विगतका आन्दोलनमा लागेका प्रहरी मुद्दा फिर्ता गर्नुपर्नेलगायतका विभिन्न माग राखेका छन् ।
उनीहरूले विभिन्न राज्यका करिब २०० किसान सङ्घले मङ्गलबार दिल्लीमा आयोजना गरिने विरोध प्रदर्शनमा भाग लिने बताएका छन् । यसैबिच किसान युनियन र सङ्घीय मन्त्रीहरूको समूहबिच समस्या समाधानका लागि वार्ता सुरु भएको बताइएको छ ।
२०२० मा पनि दिल्लीको सीमावर्ती क्षेत्रमा किसानहरुले वर्षदिन लामो आन्दोलन गरेका थिए। जसमा दर्जनौँको ज्यान गएको थियो। रासस/सिन्ह
