इलाम क्षेत्र २ बाट नव निर्वाचित प्रतिनिधि सभा सदस्य सुहाङ नेम्वाङले जनताको एक एक मतको उच्च सम्मान गर्दै काम गर्ने बताउनुभएको छ । उहाँले इलामे जनताको शिर झुक्न नदिने र बुबाको पथमा लाग्ने बताउनु भयो ।
मुख्य निर्वाचन अधिकृतको कार्यालयले प्रमाणपत्र प्रदान गरेपछि नेम्वाङले सो कुरा बताउनुभएको हो । साथै उहाँले मतदातालाई धन्यवादसमेत दिनुभयो । मुख्य निर्वाचन अधिकृत केशव प्रसाद घिमिरेले नेम्वाङलाई निर्वाचित भएको प्रमाणपत्र प्रदान गर्नु भएको थियो । कार्यक्रममा प्रतिनिधि सभाका पूर्व उपसभामुख शिवमाया तुम्बाहाम्फे, इलाम क्षेत्र १ प्रतिनिधि सभा सदस्य महेश बस्नेत लगायतको उपस्थिति रहेको थियो ।
आज बिहान सम्पन्न मतगणनामा नेम्बाङ ५ हजार ८३० मतान्तरसहित विजयी हुनुभएको हो । नेम्वाङले २७ हजार ७७२ मत ल्याउनु भएको थियो । निकटतम् प्रतिद्वन्द्वी नेपाली कांग्रेसका डम्बरबहादुर खड्काले २१ हजार ९४२ मत ल्याउनु भयो ।
पहिचान पक्षधर स्वतन्त्र उम्मेदवार डकेन्द्रसिंह थेगिम ११ हजार ४५७ मतसहित तेस्रो, रास्वपा उम्मेदवार मिलन लिम्बू ५ हजार ५० मतसहित चौथो भएका छन् । ६९ हजार ३७४ मत गणना भएको थियो । ९०२ मत बदर भएको मुख्य निर्वाचन अधिकृतको कार्यालयले जनाएको छ । रासस
