बु्द्धुको संसारमा , बुद्ध भई जन्म्यौ …

  शोभा पाण्डेय/सिलवाल

शान्तिको दियो तिम्ले, संसारमा बाल्यौ ।

दरवारको वैभव त्यागी, ज्ञान खोज्न हिँड्यौ

पञ्चशीलको सिद्धान्त नि,प्रतिपादन गर्यौ ।

ज्ञानको खोजी गर्दै जाँदा,बोधी वृक्ष मुनि

ध्यान मुद्रामा बसी तिमी, बन्यौ साह्रै ज्ञानी ।

दया,माया,करुणाका ,उपदेश दिँदै

चञ्चल यो मानव मनलाई,मधुरस प्याउँदै ।

हत्या हिंसा काटमार ,गर्न हुन्न भनी

घरघरै पुग्यौ तिमी ,खाली खुट्टा हिँडी ।

सधैं सबको भलो सोचौँ ,काम राम्रो गरौँ

बुद्धका ज्ञानलाई हामी ,चरितार्थ गरौँ ।

वैराग्य र त्यागका मूर्ति ,गौतम बुद्ध तिमी

यो ब्रह्माण्ड रहेसम्म ,सम्झन्छौँ नि हामी ।

आहतमा परेकालाई ,राहत नै बाड्छौँ

चिन्ता होइन,चिन्तन गरी ,खुसी सधैं हुन्छौँ ।

मनुष्य भई जन्मे पनि ,भगवान् नै बन्यौ

मानवका मनमा तिमी ,बस्न सफल भयौ ।

बुद्धजयन्ती सफल पार्न,सब जन लागौँ

काँडा बिच हाँस्दै फुल्ने,फूल बन्न जागौँ ।