नेपाल प्रिमियर लिग (एनपिएल) मा जनकपुर रोयल्सले लगातार चार खेलमा जित निकालेको छ। लुम्बिनी लायन्समाथि एक रनको रोमाञ्चक जित निकाल्दै जनकपुरले लगातार जित हात पारेको हो। यता लुम्बिनी लायन्स भने लगातार चार खेलमा पराजित भयो।
जितसँगै जनकपुरको प्लेअफ सम्भावना बलियो हुँदा लुम्बिनीको कमजोर भएको छ।
जनकपुरले दिएको १३७ रनको लक्ष्य पछ्याएको लुम्बिनीले ८ विकेटको क्षतिमा १३५ रन मात्र जोड्न सक्यो। लुम्बिनीले अन्तिम तीन ओभरमा पाँच विकेट गुमाउँदा २४ रन बनाउन सकेको थियो। थप दुई रन बनाउन नसक्दा लुम्बिनी लगातार चार खेलमा पराजित भयो।
अन्तिम ओभरमा लुम्बिनीलाई ९ रन चाहिएको थियो। ब्याटिङमा सन्दीप जोरासँगै साद बिन जफर थिए। बलिङमा हर्ष थाकर थिए। पहिलो बलमा जफर क्याच भए। दोस्रो बलमा दुर्गेश गुप्ताले चौका प्रहार गरे। तेस्रो बल डट भयो। चौथो बलमा एक रन लिएपछि लुम्बिनीलाई दुई बलमा चार चाहिएको थियो। पाँचौ बलमा जोराले दुई रन लिन सके। अन्तिम बलमा दुई रन चाहिँदा जोरा क्याच भए।
उत्कृष्ट प्रदर्शन गरेका क्यानेडियन अलराउन्डर थाकरले पाँच विकेट लिँदा २३ रन खर्चिए। अन्तिम बलमा आउट भएका जोराले १६ रन जोड्न सके।
त्यसअघि १९औं ओभरको दोस्रो बलमा किशोर महतोले बेन कटिङलाई ३ रनमा विकेटकिपर आसिफ शेखबाट क्याच गराए। कटिङ छक्का हान्ने चक्करमा आउट भएका थिए। तर ओभरको अन्तिम दुई बलमा सन्दीप जोराले छक्का र चौका प्रहार गर्दा लुम्बिनीलाई राहत भएको थियो।
लुम्बिनीका ओपनर आशुतोष घिरैयाले १४ बलमा ८ रन मात्र जोड्दा अर्जुन साउदले २० रन जोडे। उनले २३ बलमा २ चौका हिर्काए। अर्जुन दशौं ओभरमा शेर मल्लबाट बोल्ड भए।
कप्तान रोहित पौडेल ३० रन र टम मुर्स ३१ रनमा आउट भए। रोहित १६औं ओभर र मुर्स १८औं ओभरमा आउट भएका थिए। दुवैलाई जनकपुरका हर्ष थाकरले क्याच आउट गराए। त्यसपछि लुम्बिनीमाथि केही दबाब थपिएको थियो। मुर्स आउट भएको दुई बलपछि थाकरले विवेक यादवलाई शून्यमा आउट गर्दा खेलमा रोमाञ्चकता थपिएको थियो। यो ओभरमा थाकरले दुई विकेट लिँदा तीन रन मात्र दिए।
कीर्तिपुरस्थित त्रिवि मैदानमा टस जितेको लुम्बिनीले फिल्डिङ रोजेपछि पहिले ब्याटिङ गरेको जनकपुरले ९ विकेट गुमाएर १३६ रन मात्र बनाउन सकेको हो।
जनकपुरका लागि कप्तान तथा ओपनर अनिलकुमार साहले ४५ रन जोडे। १२ औं ओभरमा सन्दीप जोराको बलमा विवेककुमार यादवबाट क्याच हुनुअघि उनले ३९ बलमा १ चौका र ४ छक्का प्रहार गरे।
अर्का ओपनर आसिफ शेखले १६ रन जोड्दा लाहिरू मिलन्थाले २४ रन बनाए। त्यसपछिका ब्याटर भने चल्न सकेनन्।
हर्ष थाकर र जिमी निशम एक एक रनमै आउट भए। दुवैलाई डेब्यू खेलाडी अभिसेष गौतमले आउट गरे।
मोहमद मोसिन ३ रन र शेर मल्ल शून्यमा आउट भए। दुवैलाई कप्तान रोहितकुमार पौडेलले एलबिडब्लूको धरापमा पारेका थिए। अन्तिम ओभरमा शाद बिन जफरले हेमन्त धामीलाई ९ रनमा आउट गरे। जफरले नै ललित राजवंशीलाई अन्तिम बलमा रनआउट गरे। शुभ कंसाकरले नटआउट २२ रन जोडे।
बलिङमा लुम्बिनीका अभिसेष गौतमले तीन विकेट लिए भने रोहित पौडेल र शाद बिन जफरले दुई दुई विकेट हात पारे।
