शोभा पाण्डेय/ सिलवाल
२०८२ साल नयाँ वर्ष आयो
यादहरू धेरै बोकाई ८१ साल गयो।
उमङ्ग र उल्लासले सबको मन छाओस्
मौनतामा चिन्तन गर्ने ठाउँ यसले देओस् ।
सिर्जनाले नयाँ युगको बिगुल तय गरोस्
८२ले हृदयको द्वार खोली जाओस् ।
सत्प्रेरणा ,सद्भावना यो वर्षमा बढोस्
संसारभरै सुखशान्ति समृद्धिले ढाकोस् ।
शून्यबाट शिखर चुम्ने यात्रा सफल होओस्
आशाका ती किरणहरू सदा फैलिरहोस् ।
हात सदा दातव्य होस् तन बनोस् चङ्गा
कुत्सित विचार हटोस् सदा मन बनोस् गङ्गा ।
मिठाई बनुन् शब्द जति अर्थ होउन् मह
फूल जस्तै सुवास छर्न सकोस् फाली बह ।
क्षुत्पिपासा हटाउन सफल बनोस् देश
भूस्वर्ग हो हाम्रो राष्ट्र नफैलोस् विद्वेष ।
तीन करोड नेपालीको घर आँगनमा
परिवर्तन ल्याउन सकोस् सबको हृदयमा ।
उत्साह र प्रेम जागोस् नेतागणको मनमा
उन्नतिको बहार आओस् यो हाम्रो राष्ट्रमा ।
अनेकतामा एकता होस् यो हाम्रो मुलुकमा
नयाँ वर्ष २०८२ को छ है शुभकामना ।
