सहिद स्मारक ए डिभिजन लिगमा थ्रीस्टार क्लबमाथि फ्रेण्ड्सले जित हात पारेको छ।
फ्रेण्ड्सले आइतबार दशरथ रंगशालामा भएको खेलमा थ्रीस्टारलाई १-० ले हराएर जारी लिगमा पहिलो जित दर्ता गराएको हो।
फ्रेण्ड्सको जितमा १३ मिनेटमा वाग्नर डि कर्मोले गरेको गोल निर्णायक बन्यो।
जारी लिगका सुरुवाती पाँच खेलमा जित हात पार्न नसकेको फ्रेण्ड्सले छैटौं खेलमा जितको स्वाद चाखेको हो।
थ्रीस्टारको भने यो दोस्रो हार हो।
थ्रीस्टार ६ खेलबाट १० अंक जोडेर चौथो स्थानमा छ। फ्रेण्ड्स ५ अंक जोडेर एघारौ स्थानमा उक्लिएको छ।
यता सरस्वती युवा क्लबले जारी लिगमा पहिलो अंक जोड्न सफल भएको छ।
सरस्वतीले दिनको दोस्रो खेलमा ब्रिगेड ब्वाइज क्लबसँग गोलरहित बराबरी खेलेर अंक जोडेको हो।
यसअघि सरस्वती लिगका सुरुवाती पाँचै खेलमा पराजित भएको थियो। पुछारको सरस्वतीको १ अंक भएको छ। ब्रिगेड भने ७ अंक जोडेर आठौं स्थानमा छ।
