विभागीय टोली त्रिभुवन आर्मी क्लब सहिद स्मारक ए डिभिजन लिगको शीर्षस्थानमा उक्लिएको छ । दशरथ रंगशालामा सोमबार भएको खेलमा आर्मीले च्यासल युवा क्लबलाई ३–० ले पराजित गर्यो ।
खेलको पहिलो हाफमा दुवै टोलीले केही अवसर सिर्जना गरेपनि अग्रता लिन भने सकेनन् । दोस्रो हाफको ५८ औं मिनेटमा कप्तान भरत खवासले उत्कृष्ट गोल गर्दै आर्मीलाई अग्रता दिलाए । आर्मीका लागि ७३ औं मिनेटमा फरवार्ड नवयुग श्रेष्ठले अग्रता दोब्बर पारे ।
खेलको ५ मिनेट समय बाँकी रहँदा आर्मीले अर्को गोल थप्दै जित पक्का गर्यो । पेनाल्टीमा सन्तोष तामाङले गोल गर्दै आर्मीका लागि महत्त्वपूर्ण तीन अंक सुनिश्चित गरे ।
यस जितसँगै आर्मीले अंक तालिकाको शीर्ष स्थानमा उक्लँदै ३ अंकको अग्रता बनाएको छ । आर्मीले ७ खेलमा ५ जित, १ बराबरी र १ हारसँगै १६ अंक बनाएको छ ।
दोस्रो स्थानको मनाङ र तेस्रो स्थानको मछिन्द्रको समान १३्–१३ अंक रहेको छ । यता च्यासल भने ७ खेलमा १ जित, ३ बराबरी र ३ हारसँगै ६ अंकसाथ १२ औं स्थानमा नै अड्किएको छ ।
अर्को खेलमा भने संकटा क्लब र ब्रिगेड ब्वाईजले गोलरहित बराबरी खेलेका छन् ।
सातौं चरणको खेल अन्तर्गत सोमबार सातादोवाटोमा भएको खेलमा संकटा र व्रिगेडले गोलरहित बराबरी खेल्दै एक एक अंक लिएका हुन् । निर्धारित समयमा दुवै टिमले गोल गर्न नसके पछि सकंटा ९ अंकसहित आठौं स्थानमा यथावत रहँदा ब्रिगेड ब्वाईजले भने तालिकामा एक स्थान सुधार गरेको छ ।
दशौं स्थानमा रहेको ब्रिगेड बराबरीसँगै तालिकामा ८ अंकका साथ नवौं स्थानमा उक्लिएको छ । समान ८ अंक भएपनि फ्रेण्ड्स क्लब भने दशौं स्थानमा झरेको हो । -रासस
