शहीद स्मारक ए डिभिजन लिग फुटबलमा बुधबार आठौं चरणका खेलहरु शुरु हुँदैछन् । आज दशरथ रंगशालामा मछिन्द्र र नेपाल पुलिस क्लब प्रतिष्पर्धा गर्दैछन् ।
लिगमा आठौं चरणका सबै खेलहरु दशरथ रंगशालामा हुनेछन् ।
मछिन्द्र १३ अंकसहित दोस्रो स्थानमा छ भने ११ अंकसहित छैटौं स्थानमा रहेको छ । बुधबारको खेलमा मछिन्द्र विजयी भए शीर्ष स्थानमा रहेको आर्मीसँग अंक बराबरी गर्ने छ भने पुुलिस विजयी भए मछिन्द्रलाई पछि पार्दै दोस्रो स्थानमा उक्लने छ ।
सातौं चरणमा मछिन्द्र हिमालयन शेर्पासँग पराजित भएको थियो भने पुलिसले जावलाखेललाई पराजित गरेको थियो ।
बुधबारको खेलमा मछिन्द्रका दीपक राई, देवेन्द्र तामाङ र विजय धिमाल खेलमा फर्कने छन् । उनीहरु पाँचौं चरणमा मनाङसँगको खेलपछि भएको झडपका कारण दुई दुई खेलको प्रतिबन्धमा थिए । जसका कारण उनीहरुले मछिन्द्रले छैटौं चरणमा खेलेको जावालाखेल र सातौं चरणमा हिमालयन शेर्पासँगको खेल गुमाएका थिए ।
मछिन्द्रले जावलाखेललाई पराजित गरे पनि शेर्पासँग भने पराजित भएको थियो । -रासस
