वैकल्पिक फरवार्ड राजेश परियारको दुई गोलमा न्यू रोड टिम (एनआरटी) ले सहिद स्मारक ए डिभिजन लिग अन्तर्गत बिहीबार ब्रिगेड ब्वाइज क्लब (बिबिसी) लाई २–० ले पराजित गरेको छ ।
जितसँगै एनआरटीले अंक तालिकामा थ्री स्टारलाई उछिन्दै चौथो स्थानमा १ अंकको अग्रता लिएको छ । एनआरटीले ३२ औं मिनेटमा वैकल्पिक खेलाडीका रूपमा मैदानमा प्रवेश गरेका राजेशको गोलमा अग्रता लियो ।
दोस्रो हाफको सुरुवातमै एनआरटीले अग्रता दोब्बर पार्यो । ५२ औं मिनेटमा श्याम बाबुको पासमा राजेशले पेनाल्टी क्षेत्र भित्रबाट गरेको प्रहारलाई गोलरक्षकले रोक्ने कुनै अवसर पाएनन् ।
यस जितसँगै एनआरटी ९ खेलमा १५ अंकसहित चौथो स्थानमा उक्लिएको छ । लिगमा ५ जित, २ बराबरी र २ हारको नतिजा ल्याएको एनआरटी गत सिजन पुछारमा रहेको कारण २ अंक घटाइएको छ ।
बिबिसी भने ८ अंक जोड्दै ११ औं स्थानमा कायम छ ।
अर्को खेलमा भारतीय फरवार्ड उत्तम राईको गोलमा फ्रेन्ड्स क्लबले सहिद स्मारक ए डिभिजन लिग अन्तर्गत बिहीबार च्यासल युवा क्लबलाई १–० ले पराजित गरेको छ ।
खेलको ८४ औं मिनेटमा उत्तमले गरेको गोल निर्णायक बन्यो । विश्व अधिकारीको फ्रिकिक गोलरक्षक एलन न्यौपानेले बचाएपनि रिबाउन्डमा अनमार्क रहेका उत्तमले सहजै गोल गरे ।
यस जितसँगै फ्रेन्ड्स ९ खेलमा ११ अंक जोड्दै नवौं स्थानमा पुगेको छ । च्यासल भने ९ खेलमा ९ अंक जोड्दै दशौं स्थानमा छ ।
-रासस
