कालोबजारीको आरोपि अग्रवालको अवैतनिक दूत पद खारेज

सरकारले नेपालका लागि किर्गिज गणतन्त्रका मानार्थ अवैतनिक वाणिज्यदूत सुलभ अग्रवालको पद खारेज गर्ने निर्णय गरेको छ।

कूटनीतिक सुविधा र विशेषाधिकार प्रयोग गर्दै कालोबजारी गरेको आरोपमा ज्वरो नाप्ने थर्मल गनसहित उनलाई मङ्गलवार पक्राउ गरिएको थियो।

त्यसपछि बुधवार साँझ एक विज्ञप्ति जारी गर्दै परराष्ट्र मन्त्रालयले नेपालमा रहेका सबै अवैतनिक वाणिज्यदूतहरूलाई उपलब्ध गराइएका केही विशेष सुविधा खोसिएको जनाएको थियो।

उनीहरूलाई दिइएको नीलो नम्बर प्लेट र सवारी साधनमा राष्ट्रिय झण्डा प्रयोग गर्न दिने विगतको निर्णय अर्को सूचना नभएसम्मका लागि स्थगित गरिएको परराष्ट्र मन्त्रालयले बताएको थियो।

परराष्ट्र मन्त्रालयका प्रोटोकल महाशाखाले अग्रवालको पद खारेज गरिएको जानकारी किर्गिस्तानको सरकारलाई गरिएको जनाएको छ।

चीफ अफ प्रोटोकल गेहेन्द्र राजभण्डारीले अग्रवालको पद खारेज गरिएको र यस बारेको जानकारी सम्बन्धित मुलुकलाई कूटनीतिक माध्यमबाट गराइएको बीबीसी नेपालीलाई जानकारी दिए।

यसअघि परराष्ट्र मन्त्रालयले जारी विज्ञप्तिमा उनको र उनले प्रतिनिधित्व गर्ने देशको नाम उल्लेख नगरीकनै “पद र विशेषाधिकार दुरुपयोग गरी अवैधानिक गतिविधिमा संलग्न भएकाले” अग्रवाललाई दिइएका सुविधाहरू फिर्ता लिइएको उल्लेख थियो।

मङ्गलवार दिउँसो राजधानीको नक्सालस्थित बालमन्दिरबाट पक्राउ परेका ४५ वर्षका अग्रवाल हाल प्रहरी हिरासतमा छन्।

कोभिड-१९ को विश्वव्यापी सङ्कटको अवस्थामा ज्वरो जाँच्न प्रयोग गरिने अन्दाजी ३५ सय रुपैयाँ पर्ने थर्मल गनको मूल्य बढाएर १५ हजार रुपैयाँ प्रतिगोटा बेचेको आरोपमा उनलाई प्रहरीले पक्राउ गरेको थियो।

शङ्कर ग्रुपका सञ्चालक रहेका अग्रवाललाई उनले प्रयोग गर्ने २०९-एचसीसी नम्बरको कूटनीतिक नियोगको नम्बर प्लेट राखिएको पजेरो गाडी र त्यसको डिकीमा राखिएको ६७ थान थर्मल गनसहित पक्राउ गरिएको प्रहरीले बताएको थियो।

Press Release

In the context of the incident in which an Honorary Consul was found to have engaged in illegal activity misusing his position and privilege granted for his official function, the Ministry of Foreign Affairs has decided to withdraw certain facilities and privileges provided to the Honorary Consuls based in Nepal.

Accordingly, as per the decision of the Ministry, the privilege of using blue plate and the flag in official vehicle of the Honorary Consuls has been suspended with immediate effect until further notice.

Ministry of Foreign Affairs
Singhadurbar
Kathmandu
08 April 2020