“विश्वले भोलिका दिनमा पालना गर्ने निर्देशिका परिमार्जन गर्ने मञ्चमा आफ्नै मत राख्न पाउनु मेरो व्यक्तिगत उपलब्धि मात्र नभई यो नेपाली बिरामी बालबालिकाको आवाजलाई विश्वस्तरसम्म पुर्याउने गौरवशाली अवसर हो।” – डाक्टर धर्मागत भट्टराई
बालबालिकामा हुने जोर्नीबाथ (Juvenile Idiopathic Arthritis – JIA) सम्बन्धी परिभाषा, वर्गीकरण तथा उपचारका नयाँ मापदण्ड निर्माण र परिमार्जनका लागि इटालीको मिलानमा आयोजित उच्चस्तरीय अन्तर्राष्ट्रिय वैज्ञानिक सम्मेलनमा नेपालका वरिष्ठ बाल रोग प्रतिरक्षा तथा बाथरोग विशेषज्ञ डा. धर्मागत भट्टराई सहभागी हुनुभएको छ। यसै अवसरमा उहाँलाई प्रतिष्ठित PRINTO Young Researcher (Achiever’s) Award 2026 बाट सम्मानित गरिएको छ।
अन्तर्राष्ट्रिय संस्था PRINTO तथा यस क्षेत्रका वरिष्ठ वैज्ञानिकहरूको विशेष निमन्त्रणामा सम्मेलनमा सहभागी हुनुभएका डा. भट्टराईले विश्वभर बालबालिकाको बाथरोग उपचारमा प्रयोग हुने वैज्ञानिक मापदण्ड तथा निर्देशिकाको परिमार्जन र अनुमोदन प्रक्रियामा महत्त्वपूर्ण योगदान दिनुभएको छ। अन्तर्राष्ट्रिय स्तरमा प्राप्त यो सम्मान बाल-बाथरोगको उपचार तथा अनुसन्धान क्षेत्रमा उहाँले पुर्याउनुभएको योगदानको महत्त्वपूर्ण कदरका रूपमा लिइएको छ।
“हिजो पढ्थ्यौँ, आज आफैँ लेख्ने ठाउँमा पुग्यौँ”
विगतमा विदेशी विज्ञहरूले तयार पारेका निर्देशिका अध्ययन गरी बिरामीको उपचार गर्दै आएका नेपाली चिकित्सकहरू आज विश्वभर प्रयोग हुने उपचारसम्बन्धी मापदण्ड निर्माण तथा परिमार्जनमा सहभागी हुन पुग्नु नेपालको स्वास्थ्य क्षेत्रका लागि उल्लेखनीय उपलब्धि हो।
आफ्नो अनुभव साझा गर्दै डा. भट्टराई भन्नुहुन्छ, “हिजोसम्म अरूले लेखेका निर्देशिका मन लगाएर पढ्थेँ। आज विश्वले भोलिका दिनमा पालना गर्ने निर्देशिका परिमार्जन गर्ने मञ्चमा आफ्नै मत राख्न पाउँदा असाध्यै गर्व लागेको छ। यो मेरो व्यक्तिगत उपलब्धि मात्र नभई नेपाली बिरामी बालबालिकाको आवाजलाई विश्वस्तरसम्म पुर्याउने अवसर पनि हो।”
बालबालिकाको उपचारमा नयाँ आशा
बालबालिकामा देखिने जोर्नीबाथले जोर्नीहरूमा दीर्घकालीन असर पार्न सक्छ। समयमै पहिचान र उचित उपचार हुन नसके यसले बालबालिकाको शारीरिक विकास तथा दैनिक जीवनमा गम्भीर प्रभाव पार्न सक्छ। मिलानमा आयोजित वैज्ञानिक छलफल तथा निर्देशिका परिमार्जन प्रक्रियाबाट विकसित हुने नयाँ मापदण्डले आगामी दिनमा बाल-बाथरोगको सही पहिचान, वर्गीकरण र वैज्ञानिक उपचारलाई थप प्रभावकारी बनाउन सहयोग पुग्ने अपेक्षा गरिएको छ।
अन्तर्राष्ट्रिय वैज्ञानिक मञ्चमा नेपालको प्रतिनिधित्व गर्दै अनुसन्धान तथा उपचारसम्बन्धी मापदण्ड निर्माण प्रक्रियामा योगदान दिनुका साथै प्रतिष्ठित अन्तर्राष्ट्रिय पुरस्कार प्राप्त गर्नुभएको डा. भट्टराईको उपलब्धिले नेपाली चिकित्सा क्षेत्रलाई अन्तर्राष्ट्रिय स्तरमा थप परिचित गराएको छ।
डा. धर्मागत भट्टराई काठमाडौंको चाबहिलस्थित ॐ हस्पिटल एण्ड रिसर्च सेन्टरमा कार्यरत बाल रोग प्रतिरक्षा तथा बाल बाथरोग विशेषज्ञ हुनुहुन्छ।
सफल नेपाल
