प्रधानमन्त्री केपी शर्मा ओलीले शनिवार साँझ प्रधानमन्त्री निवास बालुवाटारमा मन्त्री र राज्यमन्त्रीहरूलाई बोलाएर राष्ट्रपति र आफू विरुद्ध षडयन्त्रहरू भइरहेको बताएका छन् ।
उनले विवाद चरम अवस्थामा पुगेको बताउँदै यस्तो बेलामा मन्त्रीहरूलाई तपाईँहरू कुन कित्तामा भनेर प्रश्न गर्नुपर्ने अवस्था आउन सक्ने समेत भनेको एक मन्त्रीले बताए
‘मेरा र राष्ट्रपतिका विरुद्ध भएका षडयन्त्रहरूलाई मैले बाई फोर्स, बाईस्टेप नियन्त्रण गर्नुपर्ने हुन सक्छ’ प्रधानमन्त्री ओलीको भनाई उद्धृत गर्दै ती मन्त्रीले भने, ‘यस्तो बेलामा तपाईँहरू कता भनेर मैले सोध्नु पर्ने अवस्था आएमा तपाईँहरूले आफ्नो साइड रोज्नुपर्ने हुनसक्छ ।’
पार्टीकै नेताहरूबाट राष्ट्रपतिविरुद्ध अविश्वास प्रस्ताव ल्याउने प्रयास भएकोले आफूले संसद् अधिवेशन अन्त्यको निर्णय गरेको समेत मन्त्रीहरूलाई जानकारी गराएको ती मन्त्रीको भनाई थियो ।
प्रधानमन्त्री ओलीले पार्टी एकता, राष्ट्रियता र कम्युनिस्ट आन्दोलन जोगाउनुपर्ने गम्भीर दायित्व काँधमा आएको बताउँदै त्यसमा आफूले पनि दायाँ बायाँ नगर्ने र मन्त्रीहरूलाई पनि गर्नुहुन्न भनेका थिए । यदि राष्ट्रियता र कम्युनिस्ट आन्दोलन जोगिन्छ भने आफू दुवै पद छोड्न तयार रहेको तर राष्ट्रियता र कम्युनिस्ट आन्दोलन दुवैमा खतरा उत्पन्न रहन्छ भने दुवै पद छोडेर कमजोर नहुने र त्यो हुन नदिने बताएको प्रधानमन्त्री ओलीको भनाइ उद्धृत गर्दै ती मन्त्रीले भने । सफल नेपाल
