नेपाली राष्ट्रिय टोलीका लेग स्पिनर सन्दीप लामिछानेले क्यारेबियन प्रिमियर लिग (सीपीएल) टी–ट्वान्टी क्रिकेटमा व्यक्तिगत कीर्तिमान बनाएका छन् ।
लगातार तेस्रो पटक प्रतियोगिता खेलिरहेका सन्दीपले प्रतियोगितामा अघिल्ला सिजन भन्दा धेरै विकेट लिन सफल भएका हुन् ।
ट्रीनिडाड एन्ड टोबेगोमा जारी प्रतियोगितामा सन्दीपले उत्कृष्ट प्रदर्शन गर्दै आएका छन् । उनले पछिल्लो दुई संस्करणमा भन्दा यस सिजन सर्वाधिक विकेट लिन सफल छन् ।
जारी प्रतियोगितामा सन्दीपले ६ खेल खेल्दै ९ विकेट हात पारेका छन् । जुन अघिल्लो संस्करणको भन्दा धेरै हो ।
सन्दीपले सन् २०१८ मा पहिलो पटक सीपीएल खेलेका थिए । सेन्ट किट्स एन्ड नेभिस प्याट्रियट्सबाट पहिलो सिजन खेलेका सन्दीपले ५ खेलमा ७ विकेट हात पारेका थिए ।
