~आशा पन्त
दुःख पीडा सबै हटोस् उच्च रहोस् भावना
यो तीजको सबैलाई शुभकामना ।
पोहोरको साल जस्तो थियो त्यस्तै अहिले वर्ष नि
छैन हेर कसैको मन खुसी हर्ष नि ।
लकडाउन भयो कोरोनाले झण्डै दुई वर्ष नै
चाडपर्व र रङ्ग रौस छैन हर्ष नै ।
कस्तो हो यो कोरोना कताबाट आयो नि
गरी खाने जनतालाई दसा लाग्यो नि ।
कोरोनाले लग्यो भन्छन् झन्डै दस हजार
झन्डै ममा परेन कालको नजर ।
जताततै छायो हेर,विश्व मास्ने कोरोना
हे ईश्वर ! भगवान् रक्षा गर न ।
महामारीको पीडाले नै मनमा पीर गहिरो छ
त्यसै माथि हत्याहिंसा बाढी पहिरो छ ।
महामारी ,कोरोना बाढी पैरो अति भो
देशै भरि धनजनको ठुलो क्षति भो ।
कति मरे रोगले त कति मरे भोकले
कति त यसै मरे शोकैशोकले ।
सरकार भने लाग्यो कुर्सी कै खेलमा
जनताको हेरविचार गर्ने बेलामा ।
कति राहत आउँछ जनताको नाममा
सिटामोल र जीवनजल पाइनँ गाउँमा ।
देशविदेश बाट आको सहयोग नेताको पेट भर्ने हो
दुःखी गरिब जनता त्यसै मर्ने हो ।
साह्रै पीर लाग्छ हेर सम्झँदा नि देशको हाल
नमरी बाँचे फेरि भेटौँ अर्को साल ।
