राष्ट्रपति रामचन्द्र पौडेलले एसिया कप क्रिकेट प्रतियोगितामा खेल्न पाकिस्तान जाने नेपाली राष्ट्रिय क्रिकेट टोलीलाई शुभकामना दिनुभएको छ ।
मङ्गलवार पौडेलले राष्ट्रपति भवन शीतल निवासमा एक कार्यक्रम आयोजना गर्दै बिदाई गर्नुको साथै शुभकामना दिनुभएको हो ।
विश्व क्रिकेटमा भारत र पाकिस्तान जस्ता ठूला क्रिकेट टिमसँग खेल्ने अवसर नेपाली टिमका लागि थप उत्साह भएको बताउँदै राष्ट्रपति पौडेलले उत्कृष्ट खेल प्रदर्शन र परिणाम निकाल्न नेपाली टिमलाई शुभकामना दिनुभयो ।
नेपाली टोली मङ्गलवार नै पाकिस्तानतर्फ प्रस्थान गरेको छ । नेपालले आफ्नो क्रिकेट इतिहासमा पहिलो पटक भारत र पाकिस्तानसँग खेल्न लागेको हो । एसिया कप ३० अगस्ट देखि १७ सेप्टेम्बर सम्म हुनेछ । नेपालले १३ भदौ मा पाकिस्तानसँग मुल्तानमा खेल्नेछ । नेपालले भदौ १८ मा भारतसँग श्रीलङ्काको कान्डीमा खेल्नेछ ।
