कोरियाली कार निर्माता कम्पनी हुन्डाईको चारपांग्रे गाडी बनाउने उद्योग नेपालमै सञ्चालनमा आएको छ । हुन्डाई कम्पनीको नेपालस्थित आधिकारिक विक्रेता लक्ष्मी ग्रुपले शुक्रबारदेखि उद्योग सञ्चालनमा ल्याएको हो ।
पश्चिम नवलपरासीको रामग्रामस्थित प्लान्टबाट वार्षिक आठ हजारवटा गाडी एसेम्बल गर्ने योजना छ । तर, तत्कालका लागि ४५ सय वटा उत्पादन हुनेछ । करिब १० बिघामा प्लान्ट निर्माण गरेको यो उद्योगमा दुई सय जनाले रोजगारी पाउनेछन् । पहिलो चरणमा हुन्डाईको भेन्यु गाडी बनेको छ । त्यसपछि अरू पनि बन्ने उद्योगले जनाएको छ ।
प्लान्टको आज शुक्रबार प्रधानमन्त्री पुष्पकमल दाहाल र हुन्डाई मोटर इन्डिया लिमिटेडका प्रबन्ध निर्देशक उनसू किमले संयुक्त रुपमा उद्घाटन गर्नुभएको छ । नयाँ उद्योग सञ्चालनमा आएपछि नेपालमा औद्योगिक वातावरणका निम्ति स्वदेशी एवं विदेशी लगानीकर्तालाई थप आकर्षित गर्ने विश्वास प्रधानमन्त्रीले व्यक्त गर्नुभएको छ ।
अहिले चारपांग्रे गाडी एसेम्बल गर्ने लक्ष्मी मोटर कर्पोरेसन मात्रै हो । बजाज, टीभीएस, सुजुकी, यामाहा लगायतले भने दुईपांग्रे एसेम्बल गर्दै आएका छन् ।
