गायनमा भविष्य खोज्ने प्रतिभालाई लक्षित गर्दै निर्माण गरिएको गायन प्रतियोगिता ‘सिङ्गिङ स्टार नेपाल सिजन १’ को प्रसारण शनिबारबाट सुरु भएको छ ।
‘रिल्स इन्टरटेनमेन्ट’ को प्रस्तुतिमा तयार भएको ‘सिङ्गिङ स्टार नेपाल सिजन १’ आजदेखि प्रत्येक शनिबार र आइतबार राति ९:०० बजे प्राइम टाइम्स एचडी टिभीबाट प्रसारण हुँदै छ ।
नेपालकै मौलिकतालाई प्रवर्धन गर्ने उद्देश्यसहित तयार गरिएको मौलिक नेपाली सोमा निर्णायकको भूमिकामा गायिका डा. त्रिशला गुरुङ, सङ्गीतकार अर्जुन पोखरेल र गायक सनुप पौडेल रहेका छन् । सङ्गीतकार पोखरेलले यस प्रतियोगिताले सहभागी अन्तिम १४ मध्ये गायन क्षमता भएकाले अवसर दिने बताउनुभयो ।
उहाँले भन्नुभयो, “रियालिटी सोमा गायन क्षमता भए पनि भोटिङका कारण प्रतियोगी बाहिरिनुपर्ने हुन्छ तर अन्तिम १४ मा रहेका प्रतियोगीको गायन क्षमता हेरेर भोटिङका कारण प्रतियोगिताबाट बाहिरिए पनि हामी गीत निकाल्ने अवसरको सिर्जना गर्ने छौँ । यस कारण पनि अन्यभन्दा यो प्रतियोगिता फरक छ ।”
कार्यक्रमको निर्देशक प्रमोदकुमार भण्डारी र निर्माताहरूमा शिखर गौतम, बुद्धिप्रसाद ढुङ्गाना र नभराज चौलागाईं हुनुहुन्छ ।
