प्रधानमन्त्री केपी शर्मा ओलीले नेपाललाई सहयोगापेक्षी सडक मानवमुक्त राष्ट्र बनाउने सरकारको योजनामा साथ दिन सबैसँग आग्रह गर्नुभएको छ ।
मानव सेवा आश्रमले आज काठमाडौँमा आयोजना गरेको कार्यक्रममा प्रधानमन्त्री ओलीले सडक जीवन बिताइरहेका सहयोगापेक्षी व्यक्तिहरूको व्यवस्थापनमा आवश्यक सहयोग र सहकार्य गर्न सबै सरकारी तथा गैह्र सरकारी निकायहरूलाई आग्रह गर्नुभयो ।
प्रधानमन्त्री ओलीले सडक बालबालिका तथा अन्य सहयोगापेक्षी व्यक्तिको व्यवस्थापनमा क्रियाशील गैह्र सरकारी सङ्घ–संस्थाहरूसँग आवश्यक सहयोग र सहकार्य गर्न सुरक्षा निकाय तथा सरकारका निकायहरूल निर्देशन दिनुभयो ।
प्रधानमन्त्री ओलीले समृद्ध नेपाल, सुखी नेपालीको राष्ट्रिय आकाङ्क्षालाई केन्द्रमा राखेर राजनीति गरिरहेको बताउनुहुँदै कसैको बिरोध तथा अवरोधबाट विचलित नहुने पनि बताउनुभयो ।
उहाँले असल उद्देश्यका साथ थालिएको अभियानमा विरोध गर्नेहरू आफै समाप्त भएर जाने बताउनुभयो ।
प्रधानमन्त्री ओलीले मानव अधिकारका क्षेत्रमा कार्यरत सङ्घ–संस्था तथा अभियन्ताहरूलाई समेत राजनैतिक पक्ष–विपक्षमा नलागी वास्तविक अर्थमा मानवीय सेवा र अधिकारको आवश्यकता हरेका व्यक्तिहरूको पक्षमा काम गर्न आग्रह गर्नुभयो ।
कार्यक्रममा महिला बालबालिका तथा ज्येष्ठ नागरिक मन्त्री जुली कुमारी महतोले समाज सेवाको क्षेत्रमा क्रियाशील सङ्घ-संस्थाहरू बीच समन्वय गरी लगानी अनुसारको उपलब्धि हासिल हुने वातावरण बनाउन मन्त्रालय क्रियाशील रहेको बताउनुभयो । –रासस
