१३ औँ दक्षिण एशियाली खेलकुद (साग) प्रतियोगिता भव्यतापुर्वक सम्पन्न भएको सम्बन्धमा प्रधानमन्त्री केपी शर्मा ओलीले भोली बुधबार विशेष सम्बोधन गर्ने भएका छन् ।
सोमबार साँझ राष्ट्रिय खेलकुद परिषदका सदस्य सचिव रमेश शिलवालले पत्रकार सम्मेलन गर्दै स्वास्थ्यको कारण समापन कार्यक्रम उपस्थित हुन नसकेका प्रधानमन्त्री ओलीले खेलाडीहरुलाई समेटेर बुधबार विशेष सम्बोधन गर्ने बताएका हुन् ।
प्रधानमन्त्रीले आफ्नो सम्बोधनमा पदक विजेता खेलाडीहरुलाई ‘प्रोत्साहन प्याकेज’को घोषणा समेत गर्ने सदस्य सचिव शिलवालले जानकारी दिए ।यसअघि सरकारले सागका स्वर्ण पदक विजेतालाई ३ लाख, रजतलाई २ लाख र कास्यलाई १ लाख सहित सम्मान गर्दै आएको छ ।
सदस्य सचिव शिलवालका अनुसार यो पटक भने राखेपले सागको पुरस्कार राशीमा ठूलो मात्रामा वृद्वि गर्ने तयारी गरेको छ । आज मंगलबार साँझ ५ बजे त्रिपुरेश्वरस्थित दशरथ रंगशलामा हुने समापन समारोहमा प्रमुख अतिथी उपप्रधान तथा रक्षामन्त्री ईश्वर पोखरेल हुने छन् ।
यस्तै सागको समापन कार्यक्रम उद्घाटन जस्तै भब्य हुने सदस्य सचिव शिलवालले बताए । समापन कार्यक्रमअघि नेपाल र भुटानबीच पुरुष फुटबल प्रतियोगिता हुने छ । फुटबलमा भुटानका समर्थकहरुको लागि दक्षिणतर्फको प्याराफिटमा छुट्टै स्थान दिने पनि परिषदले बताएको छ ।
समापन कार्यक्रम अन्तर्गत १२ बजे सांसद ११ र कर्मचारी ११ बीच मैत्रीपूर्ण खेल हुनेछ । फुटबलको फाइनल खेलको समापन सँगै प्रतियोगिताको समापन कार्यक्रम सुरु हुनेछ भने साथै समापन कार्यक्रम १ घण्टाको हुने बताइएको छ ।
